Romans 9

Ikhethelo Lobukhosi LikaNkulunkulu

1Ngikhuluma iqiniso ngikuKhristu – kangiqambi manga, isazela sami siyakufakaza lokhu ngoMoya oNgcwele –

2Ngilosizi olukhulu lobuhlungu obungapheliyo enhliziyweni yami.

3Ngoba ngangifisa ukuba ngabe mina uqobo ngiyaqalekiswa ngisuswe kuKhristu ngenxa yabazalwane bami, labo abohlanga lwami,

4abantu bako-Israyeli. Okwabo yikwamukelwa njengamadodana, ngeyabo inkazimulo ka-Nkulunkulu, lesivumelwano, lokwamukela umthetho, lenkezo yasethempelini kanye lezithembiso.

5Okhokho ngababo, njalo lusukela kubo usendo lwenyama lukaKhristu, onguNkulunkulu ophezu kwakho konke, odunyiswa kokuphela! Ameni.

6Akunjengokuthi ilizwi likaNkulunkulu lehluleka. Ngoba akusibo bonke abayinzalo ka-Israyeli abangama-Israyeli. 7Njalo ngokuba yinzalo yakhe akusibo bonke abangabantwana baka-Abhrahama. Kodwa-ke, “Inzalo yenu izabizwa ngo-Isaka.” 8Ngamanye amazwi, akusibantwana benyama abangabantwana bakaNkulunkulu, kodwa ngabantwana besithembiso ababalwa njengenzalo ka-Abhrahama.

9Ngoba isithembiso satshiwo kanje: “Ngesikhathi esimisiweyo ngizaphenduka, njalo uSara uzakuba lendodana.”

10Akusilokho kuphela, kodwa abantwana bakaRebheka babeyise munye, ukhokho wethu u-Isaka.

11Kodwa amaphahla engakazalwa loba esenze olunye ulutho oluhle kumbe olubi – ukuba inhloso kaNkulunkulu yokukhetha iqhubeke; 12hatshi ngemisebenzi kodwa ngaye obizayo – watshelwa ukuthi, “Omdala uzakhonza omncane.” 13Njengoba kulotshiwe ukuthi, “UJakhobe ngamthanda, kodwa u-Esawu ngamzonda.”

14Pho sizakuthini na? UNkulunkulu kalunganga na? Akunjalo! 15Ngoba uthi kuMosi, “Ngizakuba lesihawu kulowo engilesihawu kuye, njalo ngizakuba lozwelo kulowo engilozwelo kuye,”

16Ngakho-ke, akuyi ngesifiso somuntu loba umzamo wakhe, kodwa ngesihawu sikaNkulunkulu. 17Ngoba umbhalo uthi kuFaro, “Ngakuphakamisela yonale kanye injongo, ukuba ngibonakalise amandla ami kuwe lokuze ibizo lami litshunyayelwe emhlabeni wonke.”

18Ngakho uNkulunkulu ulesihawu kulowo athanda ukuba lesihawu kuye, njalo umenza abe lukhuni lowo athanda ukumenza abelukhuni.

19Omunye wenu uzakuthi kimi: “Pho kungani uNkulunkulu esisola? Ngoba ngubani ongamelana lentando yakhe na?” 20Kodwa ungubani wena, O muntu, ukuba uphendule uNkulunkulu na? “Kambe okubunjiweyo kungatsho yini kulowo owakubumbayo kuthi, “Kungani wangenza ngabanje na?’ ”

21Umbumbi kalalo yini ilungelo lokuba ngasonaleso isigaba sinye sebumba enze okunye okubunjiweyo okomsebenzi omuhle lokomsebenzi ojwayelekileyo na?

22Kunjani-ke uma uNkulunkulu watshengisa ukubekezela okukhulu izidalwa zentukuthelo yakhe ezazimiselwe ukubhujiswa etshengisa ulaka lwakhe lokwenza amandla akhe aziwe.

23Kube njani uma wenza lokhu ukuze enze ubuhle benkazimulo yakhe bazakale ezintweni zesihawu sakhe, azilungisela inkazimulo ngaphambili –

24kanye lathi asibizayo, hatshi kubaJuda kuphela kodwa lakwabezizweni?

25Njengoba esitsho kuHoseya ukuthi: Ngizakuthi ‘ngabantu bami,’ Labo abangayisibo bantu bami; Njalo ngizambiza ngokuthi ‘othandwa yimi’ kodwa engasuye ongathandwa yimi,”

26njalo, “Kuzakwenzakala ukuba kuyo kanye indawo lapho okwathiwa kubo, ‘kalisibo bantu bami,’ bazabizwa ngokuthi ‘amadodana kaNkulunkulu ophilayo.’ ”

27U-Isaya uyamemezela ngo-Israyeli esithi: “Lanxa inani labako-Israyeli linjengetshebetshebe ngasolwandle, kuzasindiswa insalela kuphela.

28Ngoba iNkosi izasifeza isigwebo sayo emhlabeni ngesiqubu langokuphelelisa.”

29Kunjengoba u-Isaya watsho ngaphambili ukuthi: “Aluba iNkosi uSomandla yayingasitshiyelanga inzalo, sasizakuba njengeSodoma, sasizakuba njengeGomora.”

Ukungakholwa Kuka-Israyeli

30Pho sizakuthini na? Sithi abezizweni abangakudinganga ukulunga, sebekutholile, ukulunga okungokukholwa; 31kodwa u-Israyeli owalandela umthetho wokulunga, kakutholanga.

32Kungani na? Ngoba kabawulandelanga ngokukholwa kodwa kwakungazathi kwakungemisebenzi. Bakhubeka “elitsheni lokukhubeka.”

33Njengoba kulotshiwe ukuthi: “Khangelani, ngibeka eZiyoni ilitshe elenza abantu bakhubeke ledwala elibenza bawe, njalo lowo othemba kuye kazukuyangiswa.”